Er Alþingi rétti vinnustaðurinn fyrir milljarðamæringa?

Ég velti stundum fyrir mér stjórnmálum og hverja við, almennu borgarar þessa lands, kjósum til að stjórna þessu fyrirtæki; Ísland hf. og hvernig sé hægt að fá fólk sem raunverulega hefur áhuga á að bæta líf þegnanna í þessu landi.

Við þessa hugsun hef ég oft staldrað við og nær alltaf kemur sama nafnið upp í hugann: Pétur Blöndal. Hvað er hann að gera á Alþingi, hagsmunasamtökum þjóðarinnar?

Sumum gæti fundist þetta vera ósanngjörn spurning því auðvitað væri barnalegt að fara fram á að eingöngu mannvinir sætu á Alþingi, peningar skipta einfaldlega of miklu máli og þá sérstaklega hvernig þeim er dreift. Jafnvægi er töfraorðið. Stjórnmálaflokka ætti ekki að fara með eins og fótboltalið, maður ætti ekki að halda með sínum flokki fram í rauðan dauðann, blint, bara af því að t.d afi manns var í flokknum fyrir 50 árum og var æðisleg mannvera. Tímarnir breytast og mennirnir með. Sjáiði bara nöfnin á sumum stjórnmálaflokkunum eins og t.d Framsóknarflokkurinn; já, það er nú naumast framsæknin í þeim flokki!!!

En fyrirgefiði, þetta var nú bara milliliður og úturdúr.

En aftur að Pétri Blöndal og tilgangi hans í stjórnmálum. Hann hefur vafalaust tekið sér til munns algengasta tilsvar stjórnmálamanna allra tíma "'Ég er í stjórnmálum til að hafa áhrif". Gott og blessað, en ef hann vill endilega hafa áhrif, af hverju rífur hann ekki upp sitt eigið peningaveski og reddar því sem redda þarf? Bara milliliðalaust. Hann vill heldur að einstæða dóttir sín sæki styrk frá Féló með tilheyrandi milliliðaþrugli og þrasi. Af hverju gefur hann henni ekki einfaldlega peninga, hann Pétur á sannarlega nóg af þeim, hafandi átt og síðar selt fyrirtæki sitt sem hafði einkarétt á því að kaupa og selja peninga. Þarna missir hann af stórkostlegu tækifæri til að sameina peningaást og mannást.

En svona menn hafa gaman af allskonar milliliðum, vilja flækja hlutina, því það skapar veltu og það er næstum þvi það sama og hagnaður, tökum sem dæmi rukkunarfyrirtækið og frekasta millilið Íslandssögunnar, Intrum, það kom inná markað sem sannarlega var ekki pláss fyrir, samt rakar þetta fyrirtæki inn milljörðum!! Ég giska á að Pétri finnist Intrum vera flottasta konsept veraldar: milliliður, fáir eigendur, mikill hagnaður!!!!

Ég er fyrsti maðurinn til að viðurkenna að það var gæfuspor fyrir Íslendinga þegar Sjálfstæðisflokkurinn og litli "Hækjuflokkurinn" eða "Viðhengisflokkurinn" settust í stjórn, rétt eftir 1990. Þá var alheims-peningasprengja í uppsiglingu og þjóðir urðu einfaldlega að hafa peningamiðaða stjórn til að verða ekki eftir á. Nú er öldin önnur, bókstaflega. Síðan þá hafa félagsleg mál setið á hakanum, á kostnað Enterprise-hugsjóna. Er í alvörunni hægt að koma svona fram við aldraða og öryrkja?

Aldraðir og öryrkjar ættu fyrir löngu að eiga fastan fulltrúa á Alþingi. Menn sem hafa efni á því að verða aldraðir og öryrkjar geta einfaldlega ekki sett sig í spor þeirra sem minna mega sín, rétt eins og ég get ekki sett mig í spor geimfara. Pétur Blöndal er oft pínlega vitgrannur um svona mál, hefur skoðanir, en engan skilning, enda þarf hann þess ekki. Kommentið hans um öryrkja "Af hverju fer þetta fólk ekki bara að vinna?" er bara hægt að líkja við fáfræði drottningar einnar í Frakklandi fyrir nokkrum öldum þegar hún var spurð um viðbrögð við yfirvofandi brauðskorti í landinu "Af hverju borðar fólkið þá ekki bara kökur?!"

Íslenska Leyniþjónustan ehf, Group eða .is?

Ég hlustaði á fréttir snemma á sunnudagsmorgni, og brá heldur betur!! Jebb, fréttin var lesin á hógværan hátt, svona fjórða frétt dagsins, og snérist um hugmyndir um það að stofna íslenska leyniþjónustu. Inntak fréttarinnar var að Björn Bjarnason hélt ræðu á fundi Rótarý-klúbbs síns og viðraði þar hugmyndir sínar hvernig best væri að standa að stofnun slíkrar stofnunnar. Ókei, stöldrum nú aðeins við og hugsum um eftirfarandi........... Sjálfstæðisflokkurinn, Frímúrararegla og leyniþjónusta!!! og svo hugsum við eftirfarandi: Repúblikkaflokkurinn í U.S.A, Frímúrarar og C.I.A!!! Já, þetta er kannski ekki frumleg leið en eitthvað verður "Morgunblaðskynslóðin" að gera til að klekkja á Baugsfeðgum, sem eiga nú næstum öll (fyrir)tækin hér á landi sem ætluð eru til skoðanamyndunar!!
Það er aðeins tvennt sem er betra en peningar til að viðhalda völdum og áhrifum: það að eiga fjölmiðla og það að eiga leyniþjónustu. Spyrjið bara einhvern í Bush-fjölskyldunni frá Texas. (þið getið svo spurt Bush eldri í leiðinni í hvaða borg hann var staddur í þegar Kennedy var drepinn, en hann var þá starfsmaður í einu af fjölskyldufyrirtækjum sínum: C.I.A) Já, ef grannt er skoðað (nóg að fara á wikipedia.org) þá hefur Bush-fjölskyldan verið viðriðin C.I.A allt frá stofnun þess, já, þessir feðgar voru ekki eingetnir af Guði!!! Afi núverandi "Bandaríkjaforseta" , Prescott bankastjóri, var sko karl í krapinu, hans uppáhalds stjórnmálamaður hét Hitler og hann gaf Adolf vini sínum oft pening því honum fannst hann svo sniðugur (en seinna fékk þó afinn bágt fyrir það) og Prescott gamli hafði ákveðnar hugmyndir um hvernig tryggja mætti völd fjölskyldu sinnar til eilífðar, jú einmitt með því að "eiga" leyniþjónustu, því þannig getur þú fengið að vita og gera allt það sem þig langar til, sama hvernig aðferðum þú kýst að nota, sumsé að leika GUÐ!!!

Já, það yrði stórt stökk fyrir Björn að fara úr tindátaleik yfir í "Guðó", ég hreinlega treysti ekki svona "byssuglöðum" og paranoid gæja til að ræða svona alvarlega hluti. En ef það er einhver alvara í þessu hugleiðingum hans um stofnun leyniþjónustu, þá þarf heldur betur að vanda tilurð fyrirtækisins og helst þyrfti að stofna nokkrar, til að hafa einhverja samkeppni, því annars getum alveg eins lagt niður alla aðra stjórnmálaflokka ef Sjálfsstæðisflokkurinn "eignast" leyniþjónustu. En ef þetta verður að veruleika þá eru hérna nokkrar tillögur um hvernig fólk á ALLS EKKI að stjórna slíkri stofnun; a) má ekki vera flokksbundin(n) neinum flokk. b) má ekki vera Frímúrari. (því svoleiðis samtök hafa að geyma fégráðugustu og valdasjúkustu siðleysingja vorrar plánetu.) c) má ekki hafa nein vina né venslatengsl inní viðskiptalífið. (ímyndið ykkur bara ef Sólveig Pétursdóttir væri forstjórinn, þá fyrst yrði Kiddi Peningur, kallinn hennar Sollu, algjörlega ósnertanlegur og langríkasti semi-guð Íslandssögunnar!!)

Já, það gæti reynst erfitt að finna kandídat í þetta starf, mér dettur helst í hug sjálfan mig!! en að öllu gamni slepptu, þá held ég að allir Íslendingar þurfi að vakna til meðvitundar um mikilvægi þessa máls, því ef ekki, þá get ég lofað því að handhafar allra valdamestu embætta landsins muni annaðhvort heita Björn eða Bjarni um aldur og ævi.

Bloggmeistarinn